२०८३ भदौ ३०, मङ्गलबार
सडक विस्तारको मलबाले नाला जाम हुँदा वीरगन्जका विभिन्न क्षेत्र जलमग्न, पानी निकासका लागि महानगरको 'एक्सन टिम' परिचालन
वीरगन्ज, २६ असार।
वीरगन्ज महानगरपालिकामा जारी सडक विस्तार अभियानका क्रममा घर भत्काउँदा निस्किएको मलबा समयमै व्यवस्थापन हुन नसक्दा मुख्य नालाहरू जाम भएका छन् । यही कारण शुक्रबार राति परेको अविरल वर्षापछि सहरका विभिन्न चोक तथा बस्तीहरू जलमग्न बनेका छन् ।
मुडली चोक, त्रिमूर्ति चोक, छपकैया इदगाह चोक, पिपरा चोक लगायतका क्षेत्रमा वर्षाको पानी निकास हुन नसकेपछि सडकहरू डुबानमा परेका छन् । सडकमा पानी जम्दा सवारी आवागमन प्रभावित हुनुका साथै स्थानीय बासिन्दाले दैनिक आवतजावतमा ठूलो सास्ती बेहोर्नुपरेको छ ।
समस्याको गम्भीरतालाई मध्यनजर गर्दै वीरगन्ज महानगरपालिकाले शुक्रबार बिहानैदेखि पानी निकासका लागि 'एक्सन टिम' परिचालन गरेको छ । एक्सन टिमका संयोजक सरफुदिन मियाको नेतृत्वमा प्राविधिक तथा सफाइकर्मीको टोली प्रभावित क्षेत्रमा खटिएर नाला सफाइ तथा पानी निकास खुलाउने कार्यमा जुटेको छ ।
महानगरपालिकाले तीन वटा एक्साभेटर, आधा दर्जन ट्याक्टर तथा एक दर्जनभन्दा बढी सफाइकर्मी परिचालन गरी नालामा थुप्रिएको ढुङ्गा, इँटा, माटो तथा अन्य भग्नावशेष हटाउने काम तीव्र रूपमा अघि बढाएको जनाएको छ ।
एक्सन टिमका संयोजक सरफुदिन मियाका अनुसार सडक विस्तारका क्रममा घरहरू भत्काउँदा निस्किएको मलबा नालामा थुप्रिएर पानीको बहाव अवरुद्ध भएकाले डुबानको समस्या उत्पन्न भएको हो । उहाँले अधिकांश नालाहरूमा मलबा भरिएकाले राति परेको वर्षाको पानी सहज रूपमा बग्न नसकेको बताउँदै नागरिकलाई छिटो राहत पुर्याउन आफ्नो टोली निरन्तर खटिरहेको जानकारी दिनुभयो ।
यता सडक विस्तारका क्रममा सडक किनारमा थुप्रिएको मलबा तथा अव्यवस्थित रूपमा छरिएका विद्युत् र इन्टरनेटका तारका कारण वीरगन्जको शहरी व्यवस्थापन थप चुनौतीपूर्ण बनेको छ । नाला जाम, हिलो र डुबानका कारण स्थानीय बासिन्दा, व्यवसायी तथा यात्रुहरूले दैनिक जीवनमा कठिनाइ भोगिरहेका छन् ।
महानगरपालिकाले भने प्रभावित क्षेत्रका नालाहरू तत्काल सफा गरी पानीको सहज निकास सुनिश्चित गर्न आवश्यक जनशक्ति तथा उपकरण परिचालन गरिएको जनाएको छ । साथै सडक विस्तारसँगै उत्पन्न भएका मलबा व्यवस्थापनलाई प्रभावकारी बनाउँदै सहरलाई यथाशीघ्र सामान्य अवस्थामा फर्काउने प्रयास जारी रहेको महानगरको भनाइ छ ।
