२०८३ भदौ ३०, मङ्गलबार
घरेलु सामग्रीबाट विद्यार्थीको सिर्जनशीलता प्रदर्शन, हरिखेतान कलेजमा प्रतियोगिता
वीरगञ्ज, भाद्र ०३,
वीरगञ्जस्थित हरिखेतान बहुमुखी कलेजमा कक्षा १२ का बिहानी सत्रका विद्यार्थीहरूले घरायसी तथा पुनःप्रयोग गर्न मिल्ने सामग्रीबाट विभिन्न कलात्मक वस्तु निर्माण गर्दै आफ्नो सिर्जनशीलता प्रस्तुत गरेका छन् ।
सामाजिक अध्ययन तथा जीवन उपयोगी शिक्षा विषयअन्तर्गत आयोजित प्रतियोगितामा विद्यार्थीहरूले दैनिक जीवनमा प्रयोग हुने तथा सहजै उपलब्ध हुने सामग्रीलाई नयाँ स्वरूप दिँदै मन्दिर, विद्यालय, कलेज, मूर्तिलगायतका नमुना तयार गरेका थिए । प्रयोगमा आइसकेका सामग्रीलाई पुनःसदुपयोग गर्दै विद्यार्थीले देखाएको कलात्मक क्षमताले कार्यक्रमलाई थप आकर्षक बनाएको थियो ।
कलेज प्रमुख किशोरी रायको अध्यक्षतामा सम्पन्न कार्यक्रममा कलेज सञ्चालक समितिका अध्यक्ष डा. राम औतार खेतान प्रमुख अतिथिका रूपमा सहभागी हुनुभएको थियो । कार्यक्रममा सञ्चालक समितिका सल्लाहकार जयप्रकाश खेतानसहित शिक्षक–शिक्षिका तथा विद्यार्थीहरूको उपस्थिति थियो ।
प्रतियोगितामा पूजा मण्डलले उत्कृष्ट प्रदर्शन गर्दै प्रथम स्थान हासिल गर्नुभयो । सोनी शर्मा लोहार द्वितीय र रेनु चौहान तृतीय हुनुभयो। विजेता विद्यार्थीहरूलाई प्रमुख अतिथि डा. खेतानले मेडल प्रदान गर्दै सम्मान गर्नुभएको थियो ।
कार्यक्रममा बोल्दै डा. खेतानले विद्यार्थीको क्षमता केवल पाठ्यपुस्तकमा सीमित नराखी व्यवहारमा उतार्नुपर्नेमा जोड दिनुभयो। घरमै उपलब्ध सामान्य सामग्रीबाट समेत उपयोगी तथा आकर्षक वस्तु तयार गर्न सक्नु विद्यार्थीको कल्पनाशक्ति, श्रम र सीपको उदाहरण भएको उहाँको भनाइ थियो ।
उहाँले यस्ता गतिविधिले विद्यार्थीभित्र लुकेको प्रतिभा पहिचान गर्नुका साथै आत्मविश्वास, सिर्जनशील सोच र व्यावहारिक सीप विकास गर्न सहयोग पुग्ने बताउनुभयो ।
प्रतियोगिताका क्रममा शिक्षक तथा अतिथिहरूले विद्यार्थीले निर्माण गरेका सामग्रीको अवलोकन गरेका थिए । सहभागी विद्यार्थीहरूको मेहनत, नयाँ सोच र स्थानीय स्रोत–साधनको उपयोग गर्ने शैलीको समेत प्रशंसा गरिएको थियो ।
कलेज प्रशासनका अनुसार विद्यार्थीको प्रतिभा र व्यावहारिक दक्षता अभिवृद्धि गर्ने उद्देश्यले आगामी दिनमा पनि अध्ययनसँगै सिर्जनात्मक तथा अतिरिक्त क्रियाकलापलाई निरन्तरता दिइनेछ ।
